یوناما: افغانستان کې د جګړو قربانیان د زیانونو د جبران غوښتنه کوي

په افغانستان کې د ملګرو ملتونو مرستندویه پلاوي (یوناما) په خپل تازه راپور کې ویلي، د څو لسیزو جګړو قربانیان لا هم له فزیکي، رواني، ټولنیزو او اقتصادي ستونزو سره مخ دي او ډېری یې عدالت او کافي ملاتړ ته لاسرسی نه لري. راپور چې له ۲۰۰۱ کال څخه د ۲۰۲۱ کال د اګست تر ۱۵مې پورې د وسله‌والو نښتو په اړه جوړ شوی، له ۱۹۵ قربانیانو او د هغوی له خپلوانو سره پر خبرو ولاړ دی. د دوی له ډلې ۸۱ سلنه د زیانونو د جبران، ۴۸ سلنه عدالت ته د لاسرسي او ۴۷ سلنه د سرغړونو د بیا تکرار د مخنیوي غوښتنه کړې ده. یوناما له چارواکو، ښکېلو لورو او د ملګرو ملتونو له غړو هېوادونو غوښتي چې د جګړو د قربانیانو حقونو او اړتیاوو ته جدي پاملرنه وکړي او د هغوی د ملاتړ لپاره اقدامات وکړي.