د امریکا د پوځ لوی درستیز جنرال مارک میلي په قطر کې له طالب استازو سره کتلي دي او دا ډله یې هڅولې چې افغانستان کې روان تاوتریخوالی کم کړي. د امریکا د پوځ یوه ویاند ویلي، جنرال میلي په دې کتنه کې په عاجله توګه د تاوتریخوالي پر کمېدو خبرې کړې دي او د یوه داسې سیاسي حل غوښتنه یې کړې، چې سیمه کې ثبات راولي او د امریکا ملي ګټې خوندي کړي. طالبانو تر اوسه له دې جګپوړي امریکایي جنرال سره د خپلې دې کتنې په اړه رسنیو ته څه نه دي ویلي. مارک میلي ویلي، چې افغانستان کې د طالبانو لخوا تاوتریخوالی د سولې خبرې ګډوډولی شي. امریکایي چارواکي پر طالبانو تور لګوي چې دوحه کې د خبرو ترڅنګ یې په افغانستان کې د حکومت او ولسي وګړو پر ضد خپل بریدونه ډېر کړي دي. جنرال مارک میلي له طالبانو سره تر کتنې وروسته په ولسمشرۍ ماڼۍ کې له ولسمشر غني سره هم ناسته درلوده.
