د سپينې ماڼۍ مرستيال وياند له خپلې دندې څخه استعفا ورکړه.
د امريکايي رسنيو د خبر له مخې،د چهار شنبې په ورځ پر کانګريس د ټرمپ د پلويانو په هجوم کې د يوې ښځې په ګډون څلور کسان وژل شوي، د پوليسو له خوا ۵۲ کسان نيول شوي، د ولسمشريزو ټاکنو ګټونکي جوبايډن له ټرمپ څخه غوښتي چې خپل پلويان دې غلي کړي .
الجريزې چينل د سپينې ماڼۍ د مرستيال وياندې سارا متيوز د استعفا خبر ورکړی او ويلي يې دي چې امريکا کې بايد واک په سوله ييز ډول انتقال شي.
د امريکا د اوسني ولسمشر ډونالډ ټرمپ زرګونه پلويان چهار شنبه په داسې حال کې کانګريس ودانۍ ته په زور ننوتل چې هلته په ولسمشريزو ټاکنو کې د جوبايډن د بريا لپاره غونډه پيل شوې وه.
کانګريس کې روانه غونډه لومړی بنده شوه او له شپږ ساعته ځنډ وروسته بېرته پيل شوه.
د يادونې وړده چې په سپينه ماڼۍ کې د ټرمپ د پاتې کېدو يوازې دوې اوونۍ وخت پاتې دی.
د ټرمپ د پلويانو دغه اقدام د ياد هېواد په داخل او له هېواده بهر سخت غبرګونونه راپارولي او دا کار يې د امريکا په اصطلاح ډيموکراسۍ ته سخته ضربه بللی.
د امريکا منتخب ولسمشر جوبايډن ويلي چې پر کانګريس بريد اعتراض نه، بلکې يوه بلوا ده.
نوموړي زياته کړې چې د چهارشنبې پېښو وښودله چې په امريکا کې ډيموکراسي له خطر سره مخ ده.
د ټرمپ مرستيال، مايک پنس هم پر کانګريس بريد غندلی او ويلي يې دي چې تاوتريخ غواړي به هېڅکله بريالي نه شي.
د امريکا پخوانۍ خارجه وزيرې هيلري کلنټن د ټرمپ پلويان کورنۍ ترهګر بللي او ويلي يې دي چې هغوی بايد پرکانګريس د بريد ځواب ووايي.
هاخوا ټويټر له خپلې پاڼې څخه د ټرمپ پيغامونه پاک کړي او د ۱۲ ساعتونو لپاره يې د نوموړي پاڼه هم بنده کړې.
بل خوا ډونالډ ټرمپ په يوه ويډيويي پيغام کې له خپلو پلويانو غوښتي چې غلي شي او خپلو کورونو ته ستانه شي، خو ادعا يې کړې چې دی ټولټاکنې له درغليو ډکې وې او بايد سوله رامنځ ته شي.
د سکاټلينډ لومړي وزير نيکولا سترجن په يوه ټويټ کې پر کانګريس بريد وحشتناک عمل بللی او دا کار يې دده په وينا د هغو کسانو لپاره شرمونکی بللی چې ډيموکراسي يې دود کړې.
د فرانسې د بهرنيو چارو وزير ادعا کړې چې پر کانګريس بريد، پر ډيموکراسۍ د بريد نښه ده.
د اروپا د پارلمان مشر، يويد ساسولي هم په يوه ټويټ کې د کانګريس پر ودانۍ د بريد له امله ژوره خواشيني څرګنده کړې او ويلي يې دي چې بايد ډيموکراسۍ ته درناوی وشي.
آيا امريکا د زوال پر لور ځي؟
تاريخ دا ثابته کړې چې لوی قدرتونه او امپراتورۍ هغه مهال نړېدلې او د زوال پر لور تللې چې له کورنيو ستونزو سره مخ شوې، داسې ښکاري چې امريکا اوس هماغه پړاو ته داخله شوې.
که څه هم په امريکا کې داخلي جنجالونه هغه مهال رامنځ ته شول چې تېر کال د پوليسو د يوه سپين پوستي افسر له خوا د جورج فلويډ په نوم يو تور پوستی په بوږنونکي ډول ووژل شول او له امله يې پراخ اعتراضونه رامنځ ته شول چې ان د امريکا تر پولو محدود نه شول، بلکې د نړۍ په ډېرو لويو ښارونو کې هم ترسره شول.
خو دا چې دغه اعتراضونه د هېواد د انتخاباتي مبارزو په اوج کې رامنځ ته شول، د امريکا سياسي فضا يې بدله او د هغو محکومو نژادونو د اواز پورته کولو لپاره يې فرصت برابر کړ چې نژاد، رنګ او قوم په پلمه ځپل شوي او محکوم شوي دي.
د امريکا په ځينو ايالتونو کې د ډونالډ ټرمپ پرضد بې مخينې پراخ لاريونونه ترسره شول او ټرمپ يې پر توکم پالنې تورن کړ او له امله يې په امريکايي ټولنه کې موجود پخواني درزونه لا پسې ژور او په ډاګه شول.
همدې نژادي تبعيضونو نتيجه وه چې د امريکا د ۲۰۲۰ ولسمشريزې ټاکنې د ياد هېواد په تاريخ کې تر ټولو جنجالي ټاکنې وبلل شوې .
دغه ټاکنې د نوامبر په درېيمه ترسره شوې او د جوزف بايډن په برياليتوب سره پای ته ورسېدې. ډونالډ ټرمپ يې مخالفت وکړ او ټاکنې يې ان د افغانستان تر ولسمشريزو ټاکنو هم بدې وبللې، د عدلي ارګانونو دروازې يې وټکولې، خو ګټه يې ونه کړه.
نوموړي ولسمشرۍ چوکۍ له لاسه ورکړه، خو د امريکا په سياست کې يې خپل ځای له لاسه نه دی ورکړی، نوموړی هڅه کوي چې جمهوري غوښتونکی ګوند کنټرول او له دې لارې د امريکا په سياست کې اغېزمن پاتې شي.
اټکل داسې کېږي چې بالاخره به په امريکا کې د افغانستان د ۲۰۱۴ کال ولسمشريزو ټاکنو له جنجال وروسته د ملي وحدت حکومت رامنځ ته شي چې هم به پکې ګټونکی جوبايډن او هم به ټرمپ پکې ونډه ولري.
دې ټولو ته په پام سره ويلای شو چې امريکا د خپل تاريخ په تر ټولو بد حالت کې قرار لري او که اوسنی وضعيت کنټرول هم شي، شک نشته چې ۲۰۲۰ او ۲۱ کال پېښې به د امريکا د زوال او ټوټه کېدو اساس او پيل وي او وخت ناوخت به پکې دا ډول او تر دې بدې پېښې به پکې رامنځته کېږي.