ولسمشر غني وایي چې د طالبانو له لوري د تاوتریخوالي دوام سولې ته د دغې ډلې ژمنتیا تر پوښتنې لاندې راوستې. په کابل کې د عامه ساتنې تصدۍ پر کارکوونکو برید ته غبرګون کې د ارګ له لوري خپرې شوې خبرپاڼه کې د ولسمشر غني له قوله راغلي، د ملي څېرو، هېوادپالانو، مدني فعالانو او نظامیانو په نښه کول جنګي جنایت دی او د طالبانو له لوري د تاوتریخوالي دوام سولې ته د دغې ډلې تعهد تر پوښتنې لاندې راوستی دی. هغه ویلي طالبانو د افغانانو او نړیوالې ټولنې د غوښتنې خلاف خپلو بریدونو ته دوام ورکړی دی او دا چاره نور هیچا ته د منلو نه ده. د یادونې ده چې په دې وروستیو کې د پلازمېنې کابل په ګډون په ډېریو ولایتونو کې د هدفي وژنو لړۍ پیل شوې چې هېوادوالو ته یې ګڼې اندېښنې پیدا کړې او د سولې پر پروسې یې د افغانانو باور زیانمن کړی دی. که څه هم طالبانو په ورته بریدونو کې لاس لرل رد کړي دي خو افغان حکومت او امریکا وایي چې طالبان په خپل انکار سره د دې بریدونو له مسوولیته خپلې اوږدې نه شي سپکولی.
