کرنې او مالدارۍ وزارت وایي، چې د هېواد په کچه د کرنیزو محصولاتو د مدیریت پروګرام له لارې د روان لمریز کال له پیله ۱۰ زره او ۸۲۸ ودانۍ جوړې شوې دي.
د دغه وزارت د اوبو لګولو او طبیعي سرچینو مرستیال حشمتالله غفوري وايي چې په دغه ودانیو کې ممیز خونې، د پیازو او کچالو زېرمتونونه او دغهراز د مڼو او انارو ساتنې لپار صفر درجې سړې خونې شاملې دي.
نوموړی زیاتوي، چې د دغو پروژو په پلي کېدو سره ۸۷ زره کسانو ته لنډمهالې دندې او ۲۹ زره کسانو ته د دایمي دندو زمینه برابره شوې ده. د هغه په خبره، د دغو پروژو د ودانیزو چارو په بشپړېدو سره، څه باندې ۱۶۵ زره مټریک ټنه کرنیز محصولات چې پکې مڼې، انګور، انار، پیاز، کچالو او یو شمېر نور محصولات شامل دي، خوندي شوي دي. کرنې وزارت وايي، چې دا پروژې د هېواد په ۳۴ ولایتونو کې پلې شوې دي.
