د ولسي جرګې غړي وایي ولسمشر غني ځان ته جمهوریت ساتونکی بولي خو چارې یې استبدادي دي او په ډېرو مواردو کې یې د هېواد قوانین نقض کړي دي. په ولسي جرګه کې د هرات د خلکو استازې ناهید فرید د ولسي جرګې د نننۍ غونډې په امتیازي ساعت کې د خبرو پر مهال وویل، چې ولسمشر د پارلمان پرېکړو ته درناوی نه لري او ټول قوانین د ځان په ګټه تفسیروي. د نوموړې په خبره ولسمشر هر څه د یوه شاهي نظام په څېر د ځان په خوښه مخ ته وړي او د خلکو نظریاتو ته درناوی نه لري. د فرید په خبره ولسمشر د جمهوري نظام تر ولسمشر ډېر د یوه دیکتاتور نظام سلطان ته ورته دی او استبدادي کړنې یې ولس ته د منلو نه دي. د ولسي جرګې ګڼو نورو غړو هم ټينګار وکړ چې ولسمشر دې له استبداد، خپلسرۍ او غیر قانوني کړنو لاس په سر شي او د ولس غوښتنو ته دې درناوی ولري. دوی وروسته له دې دغه څرګندونې وکړې چې ولسمشر د بودیجې په اړه د ولسي جرګې دريځ وغانده او همدا راز یې د رد شوو وزیرانو پر ځای هم تر دې دمه نوي وزیران نه دي معرفي کړي.
