طالبان یوازې د اوربند په منلو سره ځان د تاوتریخوالي له مسوولیت خلاصولی شي. د هېواد د بهرنیو چارو وزیر حنیف اتمر له شرق الاوسط ورځپاڼې سره په خبرو کې ویلي دي چې دمګړی په هېواد کې د تاوتریخوالي ټول مسوولیت د طالبانو پر غاړه دی. دده په وینا افغان حکومت په ځلونو له طالبانو غوښتي چې تاوتریخوالی کم کړي، اوربند ته غاړه کېږدي خو دغه ډلې تر دې دمه جګړې ته ادامه ورکړې ده. دده په وینا که طالبان وایي چې دوی تاوتریخوالی کم کړی دی، نو تر ټولو غوره لار چې کولی شي دغه خبره ثابته کړي د اوربند منل دي. هغه په خپلو خبرو کې یو ځل بیا پر طالبانو غږ کړی چې سولې ته دې خپله ژمنتیا ثابته کړي او اوربند دې ومني.
