افغان دولت د افغانستان بانک د کارکوونکو پر موټر چاودنه په کلکو ټکو غندلې ده. له ارګه خپرې شوې خبرپاڼه کې په هېواد کې د روان تاوتریخوالي ځانګړې توګه، هدفي وژنو، ماین چاودونو او نورو ترهګریزو پېښو پړه پر طالبانو اچول شوې ده. خبرپاڼه کې د ولسمشر غني له قوله راغلي چې په ملکي کارکوونکو بې رحمانه بریدونه، په ښارونو کې د چسپکي ماین چاودنې او نور ترهګریز فعالیتونه له افغان ولس سره د طالبانو ښکاره دښمني ثابتوي. ولسمشر زیاته کړې چې طالبان په خپل انکار سره د دې بریدونو له مسوولیته خپلې اوږې نه شي سپکولی.
