ناټو وایي لا هم له افغانستان د ټولو سرتېرو ایستلو ته وخت شته دی. د ناټو عمومي منشي ینس سټولټنبرګ له سي ان ان سره په تازه مرکه کې ویلي دوی دې پرېکړې ته رسېدلي چې د ټولو سرتېرو ایستلو ته لا هم وخت شته دی. دده په وینا د ناټو ارزونې ښيي چې تر دې دمه د سرتېرو ایستلو ته زمینه نه ده برابره شوې او که ناټو او امریکا په بېړه د سرتېرو د ایستلو پرېکړه وکړي نو ددې احتمال شته چې د تېرو شلو کلونو لاس ته راوړنې له منځه لاړه شي. سټولټنبرګ وایي ښایي افغانستان یو ځل بیا د ترهګرو پر مرکز بدل شي. هغه ویلي دمګړی د حل لار دا ده چې طالبان دې په افغانستان کې د جګړو د ختمولو لپاره مانادار مذاکرات ولري، پر ژمنو عمل دې وکړي او تاوتریخوالی کم کړي. دده په خبره د افغانستان د مسئلې په اړه به د ناټو او امریکا ترمنځ د نظر یووالی ادامه پیدا کوي او د حضور یا وتلو په اړه به دواړو لوري یوې واحدې هوکړې ته سره رسېږي.
