په افغانستان کې د جګړې ښکېل لوري دې د سولې لپاره رامنځ ته شوی فرصت نه ضایع کوي او د نړیوالو له تجربو دې د جګړو د ختمولو لپاره کار واخلي. د اندونیزیا پخواني مرستیال ولسمشر یوسف کالا په خپله یوه تازه مرکه کې ویلي چې په وروستیو میاشتو کې یې کابل او دوحې ته ګڼ سفرونه کړي دي او هڅه یې کړې ده چې دواړه لوري د جګړو ختمولو ته تیار کړي. دده په وینا طالبان او افغان حکومت ته په کار ده چې نرمښت وښيي او په خپل هېواد کې روانه خونړۍ جګړه د مذاکراتو پر مټ ختمه کړي. یوسف کالا دغه راز وایي چې اندونیزیا به په افغانستان کې د سولې په برخه کې خپلو هڅو ته ادامه ورکوي او له دواړو لورو سره به بیا بیا لیده کاته ولري څو وکړی شي په دې مهمه مسئله کې مثبت رول ولوبوي. دده په وینا هېواد یې بیا هم کوښښ کوي چې له دیني علماوو او دواړو لورو له مشرانو سره پر افغان سوله بیا هم لیده کاته او خبرې اترې ولري.
