چين لوی کرنيز هېواد دی. د ۲۰۱۹ کال تر پايه پورې د دغه هيواد په کليوالو سيمو کې څه باندې ۵۵۰ ميليونو خلکو ژوند کاوه، چې دغه شمېر د چين په عمومي نفوس کې نژدې ۴۰ سلنه او د کليوالو سيمو پراخوالی يې بيا په عمومي مساحت کې څه باندې ۹۴٪ نيسي. دغه راز په ټول چين کې د کرنيزې ځمکې مساحت کابو ۱۳۵ ميليونو هکتارو ته رسېږي.
چينايانو به پخوا داسې فکر کاوه، چې په کليوالو سيمو کې غريب او وروسته پاتې خلک اوسي، دوی پاکۍ ته پاملرنه نه کوي او په چارو کې ډېر بې نظمه دي، خو د چين حکومت د ۸ کلونو په پر له پسې او نه ستومانه کېدونکو زيارونو وتوانېده، چې د ۲۰۲۰ کال تر پايه پورې د کليوالو سيمو ۹۸.۹۹ ميليونه خلک له بېوزلۍ څخه خلاص کړي او په ټول هيواد کې يې ۸۳۲ ولسوالۍ د بې وزلۍ لېست څخه اېستلې دي.
د چين د دولت رئيس شي جين پينګ د فبرورۍ په ۲۵مه نېټه په پلازمېنه بېجينګ کې د خلکو په لوی تالار کې د بېوزلۍ ضد چيني مبارزې د بهير غورچاڼ او ستاينغونډه کې د يادې چيني مبارزې د پای او پوره برياليتوب اعلان وکړ او د چين د کليوالو سيمو د سمسورتيا دولتي ادارې رسماً جوړه او په کار پيل وکړ. د دغې ادارې مرکزي دنده د بېوزلۍ ضد د مبارزې برياليتوب ساتل او د کليوالو سيمو سمسورتيا ترسره کول دي.
دغه دا مانا ورکوي، چې د چين د کليوالو سيمو پرمختګ نوې تاريخي مرحلې ته ننوتلی دی.
د بېوزلۍ ضد مبارزې برياليتوب د ساتلو لپاره ۵ کلنه انتقالي موده ټاکل شوې ده او دغه اداره به په پوره توان هڅه کوي، چې ياد برياليتوب وساتي.
د چين د ۲۰۲۱ کال د لومړي دولتي حکم له مخې، د بېوزلۍ ضد موخې ته تر رسېدو وروسته يوه بله ۵ کلنه انتقالي موده ټاکل شوې ده. په دغې انتقالي موده کې به د پخوانيو بېوزلو ولسواليو لپاره اړوندې امتيازي تګلارې بدلې نشي، د بېوزلۍ په رکود کې د ولسي وګړيو د بيا لوېدو مخه به ونيول شي او د کليوالو سيمو سمسورتيا به پرمخبېول شي.
د کليوالو سيمو سمسورتيا څه باندې ۵۰۰ ميليونو چيني بزګرانو پورې تړاو لري. د چين دولت د تېرو ۸ کلونو د کوښښونو په رڼا کې کابو سل ميليونه خلک له بېوزلۍ څخه خلاص کړي او دا د انسانانو په تاريخ کې د يوې معجزې په توګه بلل کېږي. د کليوالو سيمو د سمسورتيا ستراتيژي به د يادو سلو ميليونو تنو په شمول د څه باندې ۵۰۰ ميليونو هغو چينايانو لپاره چې په کليوالو سيمو کې ژوند کوي، د راتلونکي ژوند ښکلې اينده تصوير کړي.
د دغې ستراتيژۍ په رڼا کې به د کليوالو او ښاري سيمو ترمنځ پرمختيايي توپيرونه په پر له پسې توګه کم شي، ټيټ عايدات لرونکي کسان او وروسته پاتې سيمې به د هېواد له پرمختيايي ګټو څخه هم برخمنې شي. دغه راز د کليوالو د ژوند چاپېريال به لا نور ښه او بزګران به لا شتمن شي. د معلوماتو له مخې، د چيني بزګرانو د عايداتو د زياتېدو سرعت له تېرو ۱۱ کلونو راهيسې د ښاريانو په پرتله چټک ښکاري او د عايداتو په برخه کې د ښاريانو او بزګرانو ترمنځ توپير هم په پر له پسې توګه کم شوی دی. د هر چيني بزګر پر سر کلني عايدات د ټاکل پلان موخه يو کال وړاندې پوره شوې، اوسني عايدات یې د ۲۰۱۰ کال په پرتله سل په سلو کې زيات شوي دي.
د چين په کليوالو سيمو کې به صنعتي چارو، بااستعدادو کسانو روزنې، ځانګړتيالرونکو کلتوري چارو او چاپېريال ساتلو ته پرمختګ ورکړی شي. د صنعتي چارو فعاليت د کليوالو سيمو د سمسورتيا لپاره به کليدي او مهم رول لوبوي. که يوازې صنعتي چارو ته ښه پرمختګ ورکړل شي، نو د کليوالو سيمو سمسورتيا به ترسره شي. د بااستعداده کسانو د جلبولو لپاره به مختلفې امتيازي تګلارې پلې او اسانتياوې به ورته برابرې شي. په کليوالو سيمو کې به د چين ځانګړتيالرونکې کلتوري چارې فعالې شي او د چاپېریال ساتلو چارې به د کليوالو سيمو د سمسورتيا ستراتيژۍ بنسټ وګرځي. دغه راز په دغو سيمو کې به د چاپېريال ساتلو په موخه هم د ژوند او توليد ښې لارې چارې رامنځته شي.
افغانستان هم يو کرنيز هېواد دی او د عايداتو زياتره برخه له کرنې او مالدارۍ څخه ترلاسه کوي. زياتره افغانان کرنيزې چارې ترسره کوي، نو د بېوزلۍ له منځه وړل او د کليوالو سيمو سمسورتيا ښايي د زياتو افغانانو ګډه ارزو هم وي. له بېوزلۍ څخه ځان ژغورل د بشر اخري چاره نه، بلکې د نوي ژوند او نوې هڅې پيل دی.
په چين کې د کليوالو سيمو د سمسورتيا دولتي ادارې جوړېدل دا معنی ورکوي، چې د دغه هېواد کليوالې سيمې او کرنيزې چارې به لا وغوړیږي او بزګران به د پرمختګ نوي ګامونه واخلي. د چين په کليوالو سيمو کې به يو ځل بيا د ليدو وړ ستر بدلونونه راشي او چيني بزګران به لا ښکلی او نيکمرغه ژوند ولري او چينايان به په ټول توان هڅې وکړي، چې د معجزې په څېر د کليوالو سيمو سمسورتيا جوړه کړي.