علي احمد جلالي: د خلیلزاد وروستۍ طرحه د افغانستان لپاره مهم فرصت دی

د سولې او مشارکتي حکومت لپاره د امریکا وروستۍ طرحه د افغانستان لپاره یو غوره فرصت دی. د افغانستان د کورنیو چارو پخواني وزیر علي احمد جلالي په خپله یوه مرکه کې ویلي امریکا غواړي چې د ملګرو ملتونو تر رهبرۍ لاندې د سیمې د هېوادونو په همکارۍ د افغانستان جګړه او ستونزه د تل لپاره ختمه کړي. دده په وینا افغانانو ته په کار ده چې دغه مسئله په دقیقه توګه و ارزوي ځکه دا د افغانستان د دایمي او اوږدمهاله ستونزې د ختمولو لپاره یو غوره فرصت دی. د جلالي په خبره امریکا په دې موخه دا کار کوي چې وکړی شي په افغانستان کې دایمي ثبات رامنځ ته شي، د سولې خبرې چټکې شي او د بهرنیو ځواکونو وتلو ته زمینه برابره شي. جلالي دا هم وایي چې که افغانان په دې حساسو شرایطو کې له دقت کار وا نه خلي، نو ښایي زیان وکړي، ځکه نه نړیواله ټولنه او نه هم امریکا د تل لپاره په افغانستان کې پاتې کېږي. دده په خبره ټول اړخونه په افغانستان کې له جګړې ستړي شوي دي نو د سولې لپاره رامنځ ته شوي فرصتونه باید په هېڅ قیمت ضایع نه کړل شي.