همدا اوس په پلازمېنه بېجينګ کې د چين د ملي ولسي کانګرس او ولسي سياسي مشورتي کنفرانس کلنۍ غونډې روانې دي. چينايان دغه دوه ارګانونه دوه مجلسونه بولي.
د چيني رسنيو د معلوماتو له مخې ياد دوه مجلسونه د دغه هېواد د واک او سياسي مشورو تر ټولو لوړ ملي مراجع دي چې هر کال يو ځل عمومي غونډې کوي او د ياد هېواد د دولت او واکمن گوند پر مشرتابه سربېره پکې له مختلفو پرګنو او ګوندونو استازي ګډون کوي چې د دواړو مجلسونو مجموعي شمېر شاوخوا پينځه زرو ته رسېږي، پکې د کال تر ټولو مهمو سياسي موضوعاتو په اړه له بحث او غور وروسته د رای ګېرۍ له لارې نهايي پرېکړه کېږي او دولت ته خط مشې تعينوي.
يادې غونډې نړۍ ته څه مثبت پيغام لري؟
هر کال د چين صدر اعظم د دوو مجلسونو په کلنيو غونډو کې د حکومت د تېر کال کاري رپوټ وړاندې کوي او د استازو لخوا سنجول کېږي. له معمول سره سم، دغه کاري رپوټ دوه برخې لري: يوه يې د تېر کال د حکومت کاري لاسته راوړنې او د تجربو غورچاڼ، بله يې د روان کال کاري پلانونه دي. د بېلګې په توګه، د چين صدر اعظم لي که چيانګ د مارچ په ۵مه نېټه د حکومت کاري رپوټ د وړاندې کولو پرمهال هيله وښوده چې د ۲۰۲۱ کال لپاره د چين د کورنيو توليداتو عمومي ارزښت له ۶ سلنې نه زيات پرمختګ ومومي او و يې ويل چې چين به په ۲۰۲۱ کال کې د خپلواکۍ او سولې ډيپلوماتيکو تګلارو ته دوام ورکړي، نړيوالو همکاريزو اړيکو ته به مثبت پرمختګ ورکړي، د انسانانو او نړيوالو اړيکو ګډ برخليک ټولنې ابادي به پرمخ بوزي، ورخلاصون او همکارۍ ته به دوام ورکړي، پر لا عادلانه او مناسب لوري د نړيوال اداري سيتسم د ګام پورته کولو لپاره به هڅې وکړي، نړيوالې او سيمه ييزې همکارۍ به ژورې کړي او د ساري ناروغيو د وقايې او مخنيوي په اړوندو همکاريو کې به مثبت ګډون وکړي.
داسې معلومات پر نړۍ څه اغېز کوي؟
لومړی، د چين د اوسني او راتلونکي پرمختيايي حالت معلومېږي. نړيوال به په دې پوه چې د چين حکومت به په روان کال کې د اقتصادي پرمختګ لپاره لا زيات کوښښونه وکړي، د چين راتلونکې ډيپلوماتيکې تګلارې به د سولې او خپلواکۍ پر لوري لا زيات ګامونه پورته کړي او ښايي د کرونا وبا ضد نړيوالۍ همکارۍ کې لا مثبته برخه واخلي.
په اندونيزيا کې د اسیا څېړنيز مرکز مشر بنبانګ سورنويو په دې اړه ويلي، دا چې چين له تېر کال راهیسې په اقتصاد او کرونا وبا ضد مبارزه کې د ليدو وړ وتلي لاسته راوړنې موندلې، د دغه هېواد او ټولې نړۍ لپاره مثبت اهميت لري.
دوهم، د چين له برياليو تجربو څخه برخمن شي. د روسیې د علومو اکاډمۍ د ليرې ختيځ څېړنيز مرکز مسؤل اندري وينوګلادوف څرګنده کړه چې د کرونا وبا ضد، د بېوزلۍ له منځه وړلو، د نړيوالې ادارې د پرمخبيولو، علمي او تخنيکي نوښتونو د هڅولو په شمول زياتو برخو کې د چين او نورو هېوادونو ترمنځ همکارۍ مخ په زياتېدو دي، نو هيله لري چې له چين سره اړوندې تجربې شريکې کړي.
درېيم، د چين په يادو کلنيو غونډو کې ښودل شوی مثبت معلومات او پيغامونه نړيوالو ته د اقتصادي سمسورتيا پياوړی باور برابروي. تېر کال چين په نړۍ کې يوازينی عمده اقتصاد ګرځېدلی چې مثبت پرمختګ يې وموند. دا د نورو هېوادونو لپاره تر ټولو ښه زيری دی چې ښايي دوی ژر د کرونا وبا ضد مبارزه کې برياليتوب هم تر لاسه کړي او اقتصادي او ټولنيزې چارې هم بېرته اعاده شي. د ترکيې د KEYMEN درملو شرکت اجرائيه رئيس زنديرک الاګز په دې اړه ويلي چې چين له نورو نه مخکې په خپل هېواد کې کرونا وبا کنټرول کړه او اقتصادي پرمختګ يې موندلی دی. دا ډېر وتلي برياليتونه دي چې د نړيوالې ټولنې لپاره ښه نمونه ده.
نړيوالو ته به ولې د دې غونډو موضوعات مهم وي؟
۲۰۲۱ کال د چين د کمونېست ګوند د جوړېدو له سلمې کليزې سره برابر او د چين د ملي اقتصادي او ټولنيز پرمختګ څوارلسم ۵ کلن پلان پيل دی. د چين د ۱۳م ملي ولسي کانګرس په ۴مه غونډه کې به پر څوارلسم ۵ کلن پلان او تر ۲۰۳۵ کال پورې د ليرې موخو پر مسودې بحث وشي. دا په راتلونکو ۵ کلونو کې د چين تر ټولو مهمه ملي ستراتيژي ده چې پکې د دغه هېواد د مختلفو ساحو، په تېره بيا اقتصادي چارو پرمختيايي لوري روښانه کېږي.
دا چې چين د نړۍ يو لوی صادراتي او وارداتي مرکز او ستر اقتصادي قدرت ګڼل کېږي، له بلې خوا دا چې د يادو غونډو د بحث يوه موضوع د چين د وارداتو او صادراتو پر تګلارو غور کول او تاييدول دي، ځکه نړيوال، په ځانګړې توګه سوداګر دې پرېکړو ته پاملرنه کوي. د چين حکومت به په راتلونکي کې کومو چارو ته زياته پاملرنه وکړي، په کومو برخو کې به زياتې پانګونې وکړي، د وارداتو او صادراتو څه ډول تګلارې به پلې کړي، آيا بهرنيو پانګه اچوونکو ته به اسانتياوې برابرې کړي که نه؟ که تاسو يو سوداګر ياست يا پلان لرئ چې له چين يا چينايانو سره سوداګري او معامله وکړي، دا ستاسو لپاره تر ټولو ګټور او مهم معلومات دي.