باجوه: د سیمې د امن کیلي په افغانستان کې ده

د پاکستان د پوځ مشر قمر جاوید باجوه ویلي چې افغانستان کې د امن ټینګښت د ټولې سیمې د امن ضمانت کوي او همدا لامل دی چې پاکستان په دغه هېواد کې د سولې لپاره مهم رول لوبولی دی. نوموړي په اسلام اباد کې د ملي امنیت په اړه جوړې شوې غونډې ته په خبرو کې ویلي چې پاکستان غواړي د خپلو ګاونډیو هېوادونو سره ټولې شته ستونزې د خبرو اترو له لارې حل کړي. باجوه زیاته کړې، چې د امریکا- طالبانو د دوحې تړون د پاکستان په هڅو شوی دی او دغه هېواد به له دې وروسته هم د افغان سولې لپاره خپلو هڅو ته دوام ورکړي. هغه دغه راز افغانستان کې امن د سیمه ییزو هېوادونو په صادقانه همکارۍ پورې تړلی بللی او ټینګار یې کړی دی چې ټول هېوادونه باید په دې برخه صادقانه مرسته وکړي.