ایران د ولسمشر غني د هغو څرګندونو هرکلی کړی دی چې ویلي یې وو د دواړو هېوادونو ترمنځ به د اوبو په برخه کې همکارۍ ډېرېږي. د ایران د بهرنیو چارو وزارت ویاند سعید خطیب زاده په یوه خبري کنفرانس کې ویلي ایران د هلمند په اوبو کې د ۱۳۵۱ کال د هوکړې له مخې خپل حق لري چې افغان حکومت ورته ژمن دی. نوموړي ویلي د ولسمشر غني ددې خبرې هرکلی کوي چې ګواکي له ایران سره د اوبو په برخه کې همکاریو ته تیار دي. ولسمشر غني تېره ورځ د نیمروز په چهار برجک کې د کمال خان بند د پرانیستې په مراسمو کې وویل چې له دې وروسته ایران ته وړیا اوبه نه ورکوي او په خبره یې دوی په ټول افغانستان کې د اوبو مدیریت ته ژمن دي او غواړي له دې لارې افغانستان بسیاینې ته ورسوي.
