د راپورونو له مخې دمګړی په دوحه کې د څو هېوادونو د استازو له لوري د ترکیې د راتلونکي کنفرانس پر اجنډا او تیاریو بحثونه روان دي. راپورونه وايي چې په دغه غونډو کې د ترکیې، امریکا، قطر، افغان حکومت، طالبانو او ملګرو ملتونو استازي حضور لري او دوی هڅه کوي د ترکیې د راتلونکې غونډې لپاره پر اړینو تیاریو او اجنډاوو یوې پایلې ته ورسېږي. په دوحه کې د افغان حکومت د مذاکراتي ټیم ځینو غړو هم رسنیو ته تایید کړې چې له تېرو څو ورځو راهیسې په دوحه کې د افغانستان د سولې پر راتلونکې او د ترکیې د غونډې په اړه د یادو هېوادونو ترمنځ بحثونه او خبرې روانې دي. د ملي مصالحې عالي شورا هم وایي چې دوی د ترکیې غونډې ته د طرحو پر توحید بوخت دي او تمه لري چې دغه غونډه په افغانستان کې د جګړې د ختمېدو سبب شي.
