د کډوالو نړیواله اداره: د بهرنیو ځواکونو تر وتلو وروسته ښایي د کډوالو شمېره لوړه شي

د بهرنیو ځواکونو تر وتلو وروسته ښايي د افغان کډوالو شمېره هم لوړه شي. د کډوالو نړیوالې ادارې مشر په یوه خبري غونډه کې د خبرو پر مهال ویلي که له افغانستان بهرني ځواکونه وځي او په دغه هېواد کې د سولې خبرې له خنډ او ځنډ سره مخ کېږي نو په دې حالت کې ښایي د افغان کډوالو شمېر لوړ شي. د فلېپو ګراندې په وینا د کډوالو د ډېرېدو مستقیم اغېز به پر اروپایي هېوادونو وي. د کډوالو نړیواله اداره داسې مهال دغه څرګندونې کوي چې ټاکل شوې تر سپټمبر میاشتې پورې بهرني ځواکونه له افغانستان ووځي خو په دې موده کې باید طالبان او افغان حکومت په بین الافغاني مذاکراتو کې پایلې ته ورسېږي او د روانې جګړې د ختمولو لپاره دې هڅې ډېرې کړي.