متقاعد امریکایي نظامیان: د طالبانو د مهارولو لپاره باید افغان ځواکونه پیاوړي شي

یو شمېر لوړپوړو متقاعدو امریکایي نظامیانو ویلي چې له افغانستان څخه د امریکایي سرتېرو وتل دومره لویه مسئله نه ده لکه څومره چې یې خلک وارخطا کړي دي، ځکه د دوی په باور ډېری داسې کارونه شته چې نړیواله ټولنه یې له فزیکي حضور پرته هم ترسره کولی شي. ګارډین ورځپاڼې د پخواني پوځي سایمون ډیګېنز له قوله ویلي چې د طالبانو د ځواک د مهارولو لپاره په کار ده چې افغان دولت پیاوړی شي او له افغان ځواکونو سره اړینه مرسته وشي. نوموړي دغه راز ویلي، بله مهمه موضوع چې د طالبانو د کمزوري کولو لپاره کېدای شي هغه د دغې ډلې د تمویلي منابعو له منځه وړل دي. ډیګېنز ټینګار کړی دی چې په افغانستان کې د تر لاسه شویو لاسته راوړنو لپاره ورکړل شوې قربانۍ باید ضایع نه شي.