په منځني ختیځ او شمالي افریقا کې د امریکايي ځواکونو قومندان جنرال فرانک مکنزي وايي، د دغه هېواد د ټولو ځواکونو تر وتلو وروسته هم افغان پوځ مرستې ته اړتیا لري او که ور سره ونه شي افغان پوځ ړنګېږي. د اسوشېټېډ پرېس د راپور له مخې جنرال مکنزي پرون کانګرس ته په وینا کې ویلي، چې کابل کې د امریکا سفارت د خوندیتوب لپاره هم د افغان حکومت پر وړتیا شک لري. امریکايي رسنۍ د امریکايي چارواکو له خولې وايي، د دغه هېواد پوځي قومندانانو له افغانستان د خپلو ټولو ځواکونو وتل نه غوښتل. خو جنرال مکنزي د وسله والو ځواکونو کمېټه کې ویلي، چې امریکايي ځواکونه ووځي، د هوايي څار یا ترهګرۍ ضد بریدونو لپاره به افغانستان ته د وسله والو بې پیلوټه او نورو جنګي الوتکو تګ راتګ له څلورو ساعتونو ډېر وخت ونیسي. تر دې مخکې د امریکا دفاع وزیر لویډ استین د ناټو مرکز کې وویل، چې امریکا تر وتلو وروسته هم د افغانستان ملاتړ روان ساتي.
