فارن پالیسي خپرونې په یوه لیکنه کې په افغانستان کې د بهرنیو هېوادونو د مداخلې په اړه یوه لیکنه خپره کړې ده. لیکنه کې راځي چې افغانستان پنځه لسیزې مخکې د نړۍ د ځواکمنو هېوادونو له مداخلې پرته ښې ورځې تجربه کړې خو د ډيموکراسۍ لسیزې یې ډېر کم عمر وکړ. خپرونه لیکي، اوس چې ناټو او امریکایي ځواکونه له افغانستان څخه وځي نو د پاخه عمر لرونکي ډېری افغانان هغه وختونه په یاد راوړي چې دوی یې د خپل هېواد لپاره ځلانده دوره بولي، هغه دوره چې په افغانستان کې نسبتاً عصري ډیموکراسي د متحده ایالاتو یا کوم بل ستر ځواک له مداخلې پرته په خپله د افغانانو له لوري جوړه شوې وه. لیکنه کې د افغانستان لپاره زریني دوره د محمد ظاهر شاه د واکمنۍ وروستي لس کلونه بلل شوي، چې داوود خان ورته د سپينې کودتاه په پایله کې د پای ټکی کېښود. لیکنه کاږي، د افغانستان بربادي هغه وخت پیل شوه چې بهرنیانو پکې لاسوهنې پیل کړې، ځکه چې د بهرنیانو په اشاره که چېرته د ظاهر شاه خان د وخت د لومړي وزیر موسی شفیق په څېر کسان اعدام شوي نه وای، کمونیستي کودتا نه وی شوې، افغانستان به اوس په خورا لوړ موقف کې و او د خپلې راټوکېدلې ډیموکراسۍ پر لاره به یې پام وړ بریالي ګامونه اخیستي وای.
