افغان حکومت د سولې په اړه د مسکو غونډه کې ګډون کوي

افغان حکومت وايي چې د مسکو په کوربه ‌توب د افغانستان د سولې په اړه په جوړېدونکې پراخه درې اړخیزه غونډه کې به ګډون وکړي. په پام کې ده چې دا غونډه نن جوړه شي. د افغان سولې په اړه د بحث په مقصد د پراخې درې اړخیزې غونډې په فارمټ کې امریکا، روسیه، چین او پاکستان برخه لري. د بهرنیو چارو وزارت مرستیال ویاند حامد تهذیب وايي، چې افغان حکومت به د سولې په پار په هره غونډه کې ګډون وکړي. د روسي رسنیو د راپورونو له مخې د نن ورځې په غونډه کې به د افغانستان لپاره د امریکا او روسیې ځانګړي استازي زلمی خلیلزاد او ضمیر کابلوف او د پاکستان او چین استازي ګډون وکړي. روسیې تر دې وړاندې هم ویلي چې د افغانستان د سولې له پروسې ملاتړ کوي او هڅه کوي په دغه هېواد کې د روانې جګړې د ختمولو لپاره ګامونه اوچت کړي.