سپینه ماڼۍ: له افغانستانه د امریکايي او ناټو ځواکونو وتل پيل شول

سپینې ماڼۍ ویلي، چې ځواکونو یې له افغانستانه وتل پیل کړل او په دې سره یې هغه څرګندونې تایید کړې چې یوه لوړ پوړي امریکایې جنرال کړې وې. د راپورونو له مخې شااوخوا ۱۰۰ سرتیري له پوځي تجهیزاتو سره په الوتکه کې ووتل. په همدې وخت کې د ناټو یوه چارواکې چې نوم یې نه دی ښودل شوی فرانس پرېس خبري اژانس ته تایید کړې چې له افغانستانه یې وتل پیل کړل. د ناټو دغه چارواکي دا هم ویلي چې د دې بهیر په هر پړاو کې د دې ایتلاف د ځواکونو خوندیتوب یې تر ټولو لوی لومړیتوب دی او زیاته کړې یې ده چې د دې بهیر په ترڅ کې د طالبانو هر برید به له قوي ځواب سره مخامخ شي. دی وایي، په پام کې لري چې څو میاشتو کې دا بهیر بشپړ شي، خو د دقیق وخت په اړه یې د جزئیاتو له ورکولو ډډه وکړه.