د چين د ۷مې سرشمېرنې پايلې د مۍ په ۱۱مه نېټه خپرې شوې، چې له مخې يې د دغه هيواد عمومي نفوس یو اعشاریه يو څلوېښت (۱.۴۱۱۷۸) ميليارډه ښودل شوی او دغه هيواد لا هم د نړۍ تر ټولو لوی نفوس لرونکی هېواد دی.
که څه هم په چين کې د نفوس کلنی منځنی زياتوالی ورو شوی، خو د زياتوالي تمايل يې لا هم ساتل شوی دی. د چين اوسنی نفوس په ۲۰۱۰ کال کې د دغه هېواد د ۶مې سرشمېرنې په پرتله ۷۲.۰۶ ميليونه زياتوالی ښيي، چې د زياتوالي انډول يې ۵.۳۸ سلنه دی.
د چين د ۷مې سرشمېرنې د پايلې له مخې، په دغه هېواد کې د هان قوم نفوس یو ميليارډ، دوه سوه شپږ اتيا ميليونه، درې لکه يوولس زره، درې سوه او څلور دېرش (۱۲۸۶۳۱۱۳۳۴) ښودل شوی، چې د دغه هيواد په عمومي نفوس کې ۱۱. ۹۱ سلنه نيسي. د دغه هيواد د ملي لږکيو نفوس د ۲۰۱۰ کال په پرتله ۱۰.۲۶ سلنه زياتوالی موندلی او عمومي شمېر يې يو سل او پېنځه ويشت ميليونه، څلور لکه اوه شپېته زره او درې سوه نوي (۱۲۵۴۶۷۳۹۰) ښودل شوی دی. د چين اوسنۍ سرشمېرنې ته په کتو، اټکل کېږي چې د دغه هيواد د نفوس راتلونکی زياتوالی به نور هم ورو شي او د يوې راتلونکې مودې لپاره به يې عمومي شمېر له ۱.۴ ميليارډو نه زيات وساتل شي.
په ۲۰۲۰ کال کې چين کې د زيږون انډول يوازې ۱.۳ و، چې دا ډېر ټيټ انډول دی او دا به د چين پر مخ يوه ننګونه وي. د چين د زيږون تګلارو په تنظيميدو سره له تېرو څو کلونو راهيسې د نوزيږو نفوس په چټکۍ سره زيات شوی دی.
په چين کې په ۲۰۱۶ او ۲۰۱۷ کالونو کې د نوزيږو ماشومانو نفوس په جلا جلا توګه له ۱۸ او ۱۹ ميليونو څخه زيات و، خو له ۲۰۱۸ کال وروسته د نوزيږو نفوس لږ څه کم شوی او په ۲۰۲۰ کال کې بيا په چين کې يوازې ۱۲ ميليونه ماشومان زېږېدلي دي.
د چين د ۷مې سرشمېرنې له مخې، په دغه هيواد کې څه باندې ۲۱۸ميليونه کسان په مختلفو پوهنتونونو کې زده کړې کوي او د بېسوادۍ انډول د ۲۰۱۰م کال له ۴.۰۸ څخه ۲.۶۷ سلنې ته ټيټ شوی دی. دغو شمېرو ته په کتو، چين به د خپل پرمختګ لپاره لا زيات بااستعداده کسان ولري، خو په دغه هيواد کې د محصلينو پر وړاندې استخدامي فشار به مخ په زياتېدو وي، نو چين به د اقتصادي او صنعتي جوړښت د تنظيمولو ګامونه پر له پسې چټک کړي.
د چين د ۷مې سرشمېرنې له مخې، د دغه هيواد په ښارونو کې د اوسېدونکو کسانو شمېر څه باندې ۲۰۰ ميليونه زيات شوی او د چين په لویو ښارونو او ښارګوټو کې د اوسېدونکو شمېر نهه سوه یو اعشاريه نهه نوي (۹۰۱.۹۹) ميليونو ته رسېدلی، چې د عمومي نفوس په سلو کې ۶۳.۸۹ برخه نيسي. په چين کې د ښاريانو شمېر د ۲۰۱۰ کال په پرتله ۲۳۶.۴۲ ميليونه تنه زيات شوی او ۱۴.۲۱ سلنه زياتوالی يې موندلی دی.
د چين د احسائيې ملي ادارې مرستيال لي شياو چاو وايي، چې د ښاريانو د شمېر چټک زياتوالی د اقتصاد او ټولنې د دوامدار پرمختګ او د انساني سرچينې د مناسبې ويشنې څرګندويي کوي او په ځينو سيمو کې د اقتصادي پرمختګ د خوځنده ځواک د پياوړتيا پايله ښيي. نوموړی اټکل کوي چې په چين کې به د ښاريانو شمېر په راتلونکې کې نور هم لوړ شي.
د يادې سرشمېرنې له مخې، په چين کې کابو څلور سوه ۲ نوي اعشاريه شپږ اويا (۴۹۲.۷۶) ميليونه کسان له خپل ثبت شوي استوګنځي نه بهر په نورو سيمو او ځايونو کې کار او يا ژوند کوي، چې د دغو کسانو شمېر د ۲۰۱۰ کال په پرتله په سلو کې اته اتیا اعشاريه دوه پنځوس (۸۸.۵۲) زيات شوی دی. د چين د احسائيې ملي ادارې مرستيال لي شياو چاو په خپلو خبرو کې وویل، چې د چين د اقتصادي او ټولنيزو چارو په چټک پرمختګ سره د دغه هيواد نفوس به په لا فعاله توګه مختلفو ځايونو ته انتقال شي او نوی همغږی حالت به رامنځته شي.
د چين د ۷مې سرشمېرنې په پايلو کې د چينايانو منځنی عمر ۳۸.۸ کاله ښودل شوی، چې دغه شمېر له امريکا سره برابر دی او د کاري ځواک نفوس یې (۱۶ـ۵۹ کلنۍ پورې) ۸۸۰ ميليونه ښودل شوی دی.
د چين د احسائيې ملي ادارې مشر نينګ جي جه وايي، چې په چين کې د ځوانانو لپاره د کار او استخدام سرچينې خورا ډېرې دي.