له افغانستان د امریکايي ځواکونو د وتلو سره هممهاله په دې اړه په نړیوالو او سیمه ییزو رسنیو کې ډول ډول تحلیلونه خپرېږي. ډېری رسنۍ په دې باور دي چې له افغانستان د ځواکونو ایستل به دلته د یوې بلې کورنۍ جګړې د پيل سبب شي، خو ډېری شنونکي او د چارو پوهانو بیا دا نظر لري چې که د سولې پروسه بریا ته ورسول شي نو د بهرنیانو وتل به د دایمي ثبات او سولې سبب شي. ځينې سیاسي څېرې بیا د بهرنیو ځواکونو وتل په افغانستان کې د ګاونډیو مداخلې ته د زمینه برابرېدو په مانا بولي. عام افغانان بیا له افغانستان د سرتېرو وتل د هېواد په خیر بولي.
مشهوره امریکايي ورځپاڼه نیویارک ټایمز وايي چې بایډن له افغانستان د سرتېرو دایستلو په برخه کې په حقه دی. دغه ورځپاڼې په یوه اوږده تحلیل کې ویلي چې بایډن د ټرمپ له ډېری پرېکړو سره مخالفت وکړ او دا نظر هم و چې ښایي د سرتېرو د ایستلو له پرېکړې سره یې هم مخالفت وکړي خو هغه په امریکا کې د ننه په دې موضوع د سیاسي اجماع موجودیت ته په کتو مخالفت و نه کړ. سرچینه کاږي سره له دې چې امریکايي سناتورانو د سرتېرو د ایستلو په مسئله کې د احتیاط سپارښتنه کوله خو بایډن پر خپل دريځ ولاړ و او د سرتېرو د ایستلو پرېکړه یې وکړه.
ورځپاڼه په مطلب کې وړاندې زیاتوي چې په امریکا کې د سرتېرو پر ایستلو شته سیاسي اجماع ته په پام داسې ښکاري چې بایډن په خپله پرېکړه کې په حق دی او هغه به بریالی شي چې په ټاکلې موده خپل سرتېري له افغانستان وباسي. د سرچینې په خبره ((د سرتېرو د ایستلو په تړاو په امریکا کې په لوړه کچه اجماع موجوده وه. همدې اجماع ته په کتو بایډن په حقه دی چې د سرتېرو ایستلو ته یې ادامه ورکړه)).
له دې سره جوخت په افغانستان کې د ننه سیاسي څېرې او عام افغانان په دې باور دي چې د امریکایي ځواکونو حضور دلته د جګړو او دربدریو سبب و او څومره ژر چې دغه سرتېري له افغانستان وځي دومره د افغانانو په ګټه دي. دوی په رسنیو کې د څرګندونو پر مهال خوښي ښيي چې بهرني ځواکونه له هېواد وځي او دلته د سولې لپاره هڅې پایلې ته رسول کېږي.
بلخوا ځينې د نړیوالو مسایلو څارونکي او سیاسي څېرې په دې باور دي چې د بهرنیو ځواکونو وتل به په افغانستان کې د ګاونډیو هېوادونو د مداخلې لپاره زمینه برابره کړي. په کابل کې د کاناډا پخواني سفیر به خپلو وروستیو څرګندونو کې ویلي چې پاکستان په افغانستان کې نیابتي جګړه مخ ته وړي او دغه هېواد ته په کار ده چې دغه سلسلې ته د پای ټکی کېږدي او یا دې هم نړیوال په دې اړه اقدام وکړي.
تازه په پښتونخوا وتلي سیاستوال محمود خان اڅکزي هم پر نړیواله ټولنه غږ کړی چې ګاونډیان دې د افغانستان په چارو کې له مداخلې را وګرځوي. نوموړي د جګړې له ښکېلو اړخونو ځانګړې توګه له وسله والو طالبانو غوښتي چې تاوتریخوالی بند کړي. اڅکزي ویلي، چې نړۍ نن د پوهې هغې کچې ته رسېدلې ده چې د ښکلا لپاره ان وحشي ژوي لا نه وژني خو په وینا یې افغانان هره ورځ وژل کېږي خو څوک یې په کیسه کې هم نه دي. هغه په افغانستان کې د روان تاوتریخوالي لامل د ګاونډیو هېوادونو لاس وهنه بللې او زیاته کړې یې ده چې که چېرته ګاونډي هېوادونه د افغانستان ناامنۍ ته لمن ووهي نو دغه اور به د دوی لمنو ته هم ورسېږي.
تر دې وړاندې د پاکستان د ملي اسامبلې غړي محسن داوړ هم په دې اړه څرګندونې کړې وې او د پاکستان حکومت یې ملامت بللی و چې په افغانستان کې د ترهګرو ډلو ملاتړ کوي او په پاکستان کې یې د شته مرکزونو به تړلو کې ناکام دی.
