د پاکستان په بلوچستان کې د یوه بس د چپه کېدو په پېښه کې ۱۹ کسان وژل شوي او پنځوس نور ټپیان دي. پېښه د بلوچستان په خضدار کې نن سهار شوې. سیمه ییزو رسنیو د سیمې د یوه پولیس چارواکي له قوله ویلي، چې د پېښې ټپیان نږدې روغتون ته انتقال شوي دي. په بس کې له یوه زیارته راستانه شوي مسافر ناست وو چې دادو ښار ته پر لار وو. چارواکو ویلي، د بس چلوونکي د موټر د چټکۍ په سبب کنټرول له لاسه ورکړ او په تاوېدو سره موټر واوښت.
