په داسې حال کې چې په دې وروستیو کې د کرونا ویروس له درېیمې او وژونکې څپې سره مخ دی، عامې روغتیا وزارت وايي چې دغه ګواښ پر ټول روغتیايي سیستم ناوړه اغېزه کړې ده. د یاد وزارت سرپرست وزیر وحید مجروح ویلي چې افغانستان اوسمهال د کرونا ویروس له کبله تر ټولو ناوړه حالت تجربه کوي.
د دغه وزارت چارواکي خبرداری ورکوي چې ښايي هېواد به روانه اونۍ د کرونا د درېیمې څپې د ګراف لوړې کچې ته ورسېږي. د عامې روغتیا وزارت مرستیال ویاند میرویس عليزی وايي: «متاسفانه هغه ډول چې د نویو پېښو ګراف ته ګورو، ورځ تر بلې شمېرې په لوړېدو دي. څومره چې شمېرې ډېرېږي، هومره د وخیمو ناروغانو فیصدي هم زیاتېږي. د اوس لپاره موږ لوړې کچې ته نږدې کېږو.»
روغتیا وزارت داسې مهال په هېواد کې د کرونا له کبله د ناوړه وضعیت د رامنځته کېدو خبرداری ورکوي، چې د دغه ویروس له ګواښ سره جوخت په هېواد کې د اکسېجن د کموالي غږ هم پورته شوی دی. خو دغه وزارت وايي، یونیسف ادارې د اکسېجن د تولید ۱۰ دستګاوې ور سپارلي چې په فعالېدو سره به یې دا ستونزه تر یوې کچې حل شي.
که څه هم حکومت د کرونا ویروس د لا خپرېدو د مخنیوي په موخه په ځينو ولایتونو کې یوازې ښوونیز مرکزونه تړلي، خو چارواکي وايي چې له دغه ویروس سره د مبارزې په موخه به خپل نور اقدامات هم زیات کړي. د دغو اقداماتو په دوام، حکومت له تېرې ورځې راهیسې په ټول هېواد کې پر ښوونیزو او تحصیلې ادارو، د ودونو تالارونو، هوټلونو، حمامونو، ورزشي کلپونو او نور عامه ځایونو بندېزونه لګولي دي.
خو ولسمشر غني بیا تېره ورځ په ارګ کې ویلي، افغانانو د کرونا وبا د درېیمې څپې پر وړاندې خپله وړتیا او توان ښودلی دی. نوموړي د چین لهخوا د اووه لکه ډوزه واکسینونو د مرستې رسېدو په مناسبت غونډې ته په خبرو کې وویل چې د هېواد روغتیايي سکټور د کرونا د دویمې څپې په پرتله ښه شوی دی.
په ورته د بښنې نړیوال سازمان له افغان حکومته غوښتي چې د کرونا ناروغانو لپاره دې د اکسېجن د کمښت ستونزه ژر تر ژره هواره کړي. یاد سازمان دغه راز غوښتنه کړې چې افغان حکومت دې د نړیوالې ټولنې په همکارۍ خلکو ته د کرونا واکسین او د ناروغانو د درملنې لپاره لازمې اسانتیاوې برابرې کړي. د بښنې نړیوال سازمان وايي، د کرونا درېیمې څپې افغانستان ځپلی او که نړیواله ټولنه له دې هېواد سره مرسته ونه کړي، نو امکان لري چې وضعیت د افغان حکومت له کنټروله ووځي.
دا په داسې حال کې ده چې په افغانستان کې په تېرو ۲۴ ساعتونو کې د کورونا ۹۷۳ نوې پېښې ثبت شوې او ۶۷ تنه ترې مړه شوي دي. له دې سره په افغانستان کې د یاد ویروس له امله د مړو شویو کسانو شمېر۳۵۲۷ ته او پرې د اخته کسانو شمېر ۸۹زره ۸۶۱ تنو ته لوړی شوی دی.
