ملګري ملتونه: د افغان سولې ټول ملاتړي اړخونه د روان وضعیت مخالف دي

ملګري ملتونه وایي په افغانستان کې د تاوتریخوالي کمولو لپاره خپلو هر اړخیزو هڅو ته ادامه ورکوي. د ملګرو ملتونو د سکرټر جنرال ځانګړي استازي له حنیف اتمر سره کتلي دي او پر بېلو مسایلو یې خبرې کړې دي. نوموړي ویلي ملګري ملتونه او ټول هغه اړخونه چې د افغانستان د سولې ملاتړ کوي د اوسني تاوتریخوالي او روان وضعیت مخالف دي او ددې غوښتونکي دي چې ژر تر ژره جګړې کمې شي او یو دایمي اوربند رامنځ ته شي. هغه زیاته کړې چې ملګري ملتونه په افغانستان کې د اوربند د تامین لپاره خپلو هر اړخیزو هڅو ته ادامه ورکوي او تمه لري چې روانې جګړې ژر تر ژره ختمې شي. حنیف اتمر هم د سولې په راتګ کې د نړیوالې ټولنې او ملګرو ملتونو مرسته او همکاري اړینه بللې ده او ټینګار یې کړی چې د سولې د راوستو لپاره دې خپل فشارونه ډېر کړي.