د بریتانیایي پارلمان غړی: د ځواکونو ایستل دښمنان زړور او ملګري مایوسه کوي

مېل انلاین خپرونې له افغانستان څخه د بریتانیایي ځواکونو د وتلو په اړه د دغه هېواد د پارلمان د غړي ټام ټوګینداټ مقاله خپره کړې ده. نوموړي ویلي چې له افغانستان څخه د ځواکونو وتل یوه ستره ستراتیژیکه تېروتنه ده. هغه چې څلور کاله یې په منځني ختیځ کې هم خدمت کړی دی ویلي، له افغانستانه د ځواکونو ایستل په دې مانا دي چې بریتانیا دې له دې وروسته پر نورو هېوادونو د اغېز خپرولو کیسه هېره کړي. د نوموړي په باور د ځواکونو ایستل دښمنان زړور او پیاوړي خو متحدین مایوسه کوي. ټام دا څرګندونې وروسته تر هغه کوي چې بریتانیا ویلي، ډېر ژر به د بریتانوي ځواکونو وروستۍ ډلګۍ هم له افغانستان څخه ووځي.