روغتیا وزارت په مشروط ډول؛ د تعلیمي او تحصیلي مراکزو د پرانیستل کېدو خبر ورکړی

روغتیا وزارت په مشروط ډول د لوی اختر له څلورمې ورځې وروسته د تعلیمي او تحصیلي مرکزونو د پرانیستل کېدو خبر ورکړی دی. د یاد وزارت په خبره، د پوهنې او لوړو زده کړو وزارت سره په همغږي یې د تعلیمي او تحصیلي مراکزو د پرانیستې طرحه چمتو کړې ده. د دغه وزارت د معلوماتو له مخې، په هغه صورت کې چې د کرونا وبا مثبتې پېښې مخ په ځوړ وي، اړونده مراکزو د کرونا وبا واکسین په بشپړ ډول تطبیق کړي وي، روغتیایي سپارښتنو ته په جدي پاملرنې کولی شي خپل حضوري درسونه د لوی اختر له څلورمې ورځې وروسته په تدریجي ډول پیل کړي. په همدې حال کې یاد وزارت ویلي چې په تېرو ۲۴ ساعتونو کې په هېواد کې د کرونا وبا ۱ زر او ۲۲۶ نورې مثبتې پېښې ثبت شوې دي. د دغه، په همدې موده کې پر یاد ویروس اخته ۸۴ تنه مړه شوي هم دي. د روغتیا وزارت د وروستیو معلوماتو له مخې، تر اوسه په هېواد کې پر کرونا د اخته کسانو ټول شمېر یو ۱۳۱ زره او ۵۸۶ ته او د مړه شویو هغه بیا  ۵ زره او ۵۶۱ ته لوړ شوی دی.