توشیبا څو ملیتي جاپانی شرکت دی. مرکزي دفتر یې د جاپان په توکیو ښار کې دی. د ټکنالوژۍ، اطلاعاتو، اړیکو، برقي سیستم، صنعتي وسایلو، طبي سامان الاتو، دفتري وسایلو او دې ته ورته نور و برخو کې خدمات وړاندې کوي. توشیبا شرکت د اکترونیک د دوو کمپنیو له یو ځای کېدو رامنځته شوی دی.
د دغو دواړو شرکتونو وده په ګډه لا پراخه شوه او دغو دواړو جاپاني شرکتونو خپلو کارونو ته لا پراختیا ورکړه. لا ګړندي شول او د ټکنالوژۍ په عصر کې یې اغیزناک ګامونه پورته کړل. توشیبا شرکت په دې وخت کې د ډیجټلي محصولاتو د تولید په برخه کې ګام کېښود. دوی الکترونیکي وسایل تولیدول او د کمپیوټر تولید یې هم ورسره جوخت پیل کړ. په هغه وخت کې د نورو کورنيو محصولاتو تر څنګ، ځينې ځانګړي وسایل وو چې د توشیبا له کمپنۍ تولیدېدل او هغه وخت یې په جاپان کې ځانګړی شهرت درلود.
همدا اوس هم توشیبا له ډل، ایچ پي، ایسر او لنوو وروسته د نړۍ پنځم ستر شرکت دی، چې تر ټولو ښه کمپیوټرونه تولیدوي. دغه شرکت همدا رنګ په نړۍ کې څلورم شرکت دی چې د رسنیو د وسایلو د تولید په برخه کې کار کوي او همدارنګه د ارطباتي وسایلو تولید هم په دغه شرکت کې په لوړه پيمانه او ښه کیفیت دی.
په ۱۸۵۷ کال کې په جاپان کې د لومړي ځل لپاره د تلګراف د وسایلو د تولید کار پیل شو. په هغه وخت کې د دغو وسایلو د تولید د کار ځای نوم، تاناکا سیزو شو و، چې مانا یې د تاناکا د انجنیرۍ کارځای دی. بنسټګر یې هم تاناکا هیساشګ و، په هغه وخت کې نوموړي دوې اختراعګانې کړې وې، یوه نانځکه یې جوړه کړې وه چې هغه الکترونیکي وه او ډېری خلک یې د اوسني رباط لپاره بنسټ بولي او یو عجیب ساعت یې جوړ کړی و چې په هغه وخت کې خلکو ته په زړه پورې و.
په همدې وخت کې سیزاکو شو شرکت هم د سنګینو الکترونیکي وسایلو د تولید په برخه کې کار کاوه. وروسته په ۱۸۹۹ کال کې د شرکت نوم بدل شو، نوم یې ورته توکیو دنکي کېښود. دوی لا هم د الکترونیکي وسایلو د تولید په برخه کې کار کاوه. وروسته توکیو دنکي له تاناکا سره یو ځای شوه او په ځايي نوم توکیو شیبورا دنکي باندې مشهوره کمپنۍ یې جوړه کړه. دوی ځکه سره یو ځای شول چې تګلارې او پلانونه یې سره ورته وو او غوښتل یې په یوه لوري ګام واخلي او په یو ځای کېدو نور هم سره پیاوړي شي.
دغه شرکت ډېر ژر د توشیبا په نامه مشهور شو، په ۱۹۷۸ کال کې یې اوسنی نوم توشیبا رسماً نوم شو او پر لوحو باندې یې همدا نوم ولیک. توکیو شیبورا دنکي شرکت په ۱۹۳۰ کال کې لومړنی یخچال او د کالیو مینځلو لومړنی ماشین اختراع کړ. یو کال وروسته یې لومړنی برقي جارو جوړ کړ. په ۱۹۴۲ کال کې لومړنی رادار هم د همدې شرکت له لوري جوړ او ګټه اخیستنې ته وسپارل شو. په ۱۹۵۵ کال کې یې نورې اختراعګانې هم وکړې. څلور کاله وروسته یې لومړنی ترانستوري ټلویزیون جوړ کړ او همدا راز یې لومړنی مایکرو برقي اجاق هم جوړ کړ.
په ۱۹۶۳ کال کې دې شرکت د هستوي برښنا د تولید لومړنی ستر او قوي توربین جوړ کړ، هغه توربین د ۱۲۵۰۰ کېلوواټه برښنا د تولید ضرفیت درلود. په ۱۹۷۸ کال کې یې د چاپ لپاره یو ځانګړی نوی ماشین جوړ کړ چې له مخکنیو سره یې ډېر توپير درلود. دوی په همدې توګه په بېلو برخو کې کار کاوه، توربیونونه، د کور وسایل، الکترونیکي وسایل، لامپونه او دې ورته نور شیان یې تولیدول.
د اېم آر آی له نامه سره ښايي تاسې ډېر بلد وی، دا وسیله هم د لومړي ځل لپاره په ۱۹۸۲ کال کې توشیبا کمپنۍ جوړه کړې ده. دغه شرکت په ۱۹۸۵ کال کې خپل لومړنی لپټاپ هم جوړ کړی دی. توشیبا شرکت ډېر وخت کوښښ کاوه چې له نورو کمپنیو سره په ګډه ځينې وسایل تولید کړي. یو وخت یې له پاناسونیک سره همکاري پیل کړه، دا وخت دوی کوښښ کاوه چې د الکترونیکي وسایلو د حافظو د لوړولو په برخه کې هڅې وکړي. دوی د فلشونو پر حافظه کار وکړ او په ۲۰۰۵ کال کې د نړۍ لومړنی فلش چې ۵ جي بي حافظه یې لرله، د توشیبا له لوري جوړ شو.
توشیبا داسې عادي کمپنۍ نه وه که یې پر اختراعاګانو خبرې وشي، ښايي تاسې هم ورته حیران شی. لومړني رنګه موبایل ته همدلته وده ورکړل شوه، لومړني رنګه ټلویزیون همدلته پراختیا پیدا کړه، د معلوماتو د ذخیره کولو لپاره ډیسک یا حافظه همدلته نړیوالو ته وړاندې شوه. توشیبا یو هڅانده او د الکترونیک په نړۍ کې یو پېژندل شوی نوم دی. خو په دې وروستیو کې یې فعالیتونه له نورو سره سیالي نه شي کولی. توشیبا شرکت د نړۍ په ګوټ ګوټ کې د څېړنې او تحقیق ۳۹ مرکزونه لري، په دې مرکزونو کې تر ۴۱۸۰ کسانو پورې کار کوي. دغه شرکت اوس هم تر ۲۱۰ زره ډېر کار کوونکي لري. دغه کسان د توشیبا په څانګو کې د نړۍ په ۳۰۰ بېلو مرکزونو کې کار کوي.
همدارنګه توشیبا ۵۲۰ کارځایونه یا فابریکې لري، دا فابریکې د نړۍ په ۳۰ هېوادونو کې موقعیت لري، د اټومي انرژۍ د تولید په برخه کې هم کار کوي او په دې څانګه کې یې ۲۰ په کارپوه او روزل شوي کسان په دندو ګمارلي دي. دغه شرکت په جاپان کې د خپل امنیت لپاره ۴ زره کسان او د نړۍ په نورو برخو کې زر کسان ګومارلي دي.
توشیبا شرکت د کلني ۶۰،۸۰ میلیاردو پلور په درلودلو او د ۱،۱۷ میلیارده ډالرو خالصې ګټې په لرلو د نړۍ د ۵۰۰ غوره شرکتونو په کتار کې ۹۱ ځای لري. د دغه شرکت د پلور تر ټولو لویې سیمې دا دي: ۵۱ سلنه تولیدات یې په جاپان کې پلورل کېږي، ۲۰ سلنه په اسیا کې، ۱۵ سلنه په شمالي امریکا کې، ۱۲ سلنه په اروپا کې او ۲ سلنه د نړۍ په نورو برخو کې.
د توشیبا له بنسټګرانو یو هم تاناکا هیساشیګ دی، هغه په جاپان کې تر ټولو ستر مخترع دی. په ۱۷۹۹ کال کې پیدا شوی دی. په ۱۸۵۴ کال کې یې د تلګراف تجهیزات اختراع کړل او د هغه کارځای یې په توکیو کې جوړ کړ. ځانګړی ساعت او ځانګړې نانځکه یې جوړ کړه، ډېر واړه او لوی شیان وو چې هیساشیګ جوړ کړل. د تلګراف د جوړولو هڅې او پراختیا په هغه وخت چې جاپان د پرمختګ هڅې کولې، یوه ستره لاسته راوړنه وه، هغه په ۱۸۷۲ کال کې توکیو ته ولاړ او د لومړي ځل لپاره یې د اوسنۍ توشیبا کمپنۍ بنسټ کېښود. اوسنۍ توشیبا کمپنۍ د توکیو ښار په ګینزای کې موقعیت لري.
تانکا په ۱۸۸۱ کال کې ومړ، شاګرد یې دای کیچي تاناکا د هغه لاره تعقیب کړه، هغه په دویم تاناکای مشهور و او په ۱۸۸۲ کال کې یې د تاناکا د انجنیرۍ او ساختماني کمپنۍ جوړه کړه. په ۱۹۰۴ کال کې یې د دې کمپنۍ نوم بدل کړ او شیبارا یې ورباندې کېښود.
د توشیبا کمپنۍ بل بنسټګر ایشی سوکی فوجیو کا دی، هغه د جاپان د برق د پلار په نامه مشهور دی. په ۱۸۵۷ کال کې پيدا شوی دی. هغه له برښنا سره ډېره مینه لرله او په همدې برخه کې یې زده کړې کړې وې. په ۱۸۸۴ کال کې یې امریکا ته یو سفر درلود او هلته یې له توماس ادیسون سره وکتل. بېرته جاپان ته راستون شو او په ۱۸۸۶ کال کې یې د پوهنتون له استادۍ لاس واخیست. څلور کاله وروسته یې د لامپونو د تولید کارځای پرانیست. هغه د برښنا انرژي جاپانایانو ته ور وپېژندله او دوی یې د برښنا عصر ته د ننه کړل. فوجیکا په ۱۸۹۰ کال کې لومړنی برښنايي ابتدايي ریل ګاډۍ جوړ کړ او بالاخره د جاپان د برښنا پلار په ۱۹۱۸ کال کې ومړ.
په ۱۸۷۵ کال کې په جاپان کې ځینو کمپنیو په کار پيل وکړ، دوی به د تلګراف وسیلې جوړولې، وروسته د تاناکا د انجنیرۍ کارځای هم په کار پيل وکړ، مؤسس یې تاناکا هیساشګ و او دغه شرکت په ۱۸۸۱ کال کې د خپلو برقي نانځکو او ځينو ساعتونو له امله ښه نوم لاره. په ۱۹۳۹ کال کې ځینو کمپنیو اتحاد وکړ او سره یو ځای شوې څو تر یوه نامه لاندې په لوړه پيمانه تولیدات ولري، دوی په هماغه محلي نامه د توکیو شېبورا دنکي د الکترونیکي وسایلو لوی مرکز جوړ کړ.
وروسته دا شرکت ډېر ژر د توشیبا په نامه مشهور شو، په ۱۹۷۸ کال کې یې رسمي نوم هم همدا شو، دا کمپنۍ ورځ تر بلې مخ ته روانه وه، په ډېرو نوښتونو ېې لاس پورې کړ، په ۱۹۳۰ کال کې د کالیو مینځلو لومړنی ماشین همدې کمپنۍ جوړ کړ، یخچال یې هم جوړ کړی و، یو کال وروسته یې لومړنی برقي جارو جوړ کړ، په ۱۹۴۲ کال کې لومړنی رادار توشیبا کمپنۍ جوړ کړ، دوی همداسې د الکترونیکي وسایلو د جوړولو په برخه کې پرمختګ کاوه، دوی لومړنی ترانزستون ټلویزیون او وړ برقي اجق جوړ کړ. توشیبا له دې نه هم لوی کارونه وکړل، په ۱۹۶۳ کال کې یې د اتومي برق لپاره تر ټولو لوی سیستم چې ۱۲۵۰۰ کیلوواټه قدرت یې لاره، جوړ کړ. له دې څو کاله وروسته دغه شرکت ډېرې پراختیایي او کشفي پروژې پیل کړې او په ډېرو کې بریالی هم شو. توشیبا نه یوازې الکترونکي وسایل جوړول، بلکې په طبي برخه کې هم لومړنی ایم آر آی ماشین په ۱۹۸۲ کال کې توشیبا جوړ کړی دی، دوی همدارنګه د لمر د برښنا لپاره شمسۍ یا سولرونه جوړ کړل، په ۱۹۸۵ کال کې یې لپټاپ جوړ کړ چې د مشتریانو له تاوده هرکلي سره مخ شو او په ۱۹۹۵ کال کې یې د ډي وي ډي ډيسکونه جوړ کړل. دوی په پراخه کچه کار کاوه، تر ۲۰۰۵ کال پورې یې ایچ ډي وي ډي جوړه کړه، نن توشیبا د برقي وسایلو د جوړولو په برخه کې تر ال جي هیتاچي او توشیبا همدارنګه د اداري ماشینونو او حسابي وسایلو د تولید په برخه کې مخکښ شرکت دی. دوی د شتمنۍ او کارګرانو د موجودیت له اړخه هم د نړۍ د پراخو کمپنیو په قطار کې دي.