د پښتون ژغورنې غورځنګ مشر منظور پښتین یو ځل بیا ویلي چې پاکستان لا هم په افغان چارو کې لاسوهنې کوي او په وینا یې څو پورې چې دغه هېواد په افغان چارو کې مداخله بنده کړې نه وي افغانستان ته سوله نه شي راتلی. هغه د جنوبي وزیرستان په مکین سیمه کې د امن په نوم یوې سترې ولسي غونډې ته په وینا کې ویلي چې امریکا، پاکستان او طالبان دې د افغان ولس رایو ته درناوی وکړي. نوموړي ټینګار کړی دی چې په زور راغلي حکومتونه په زور لرې شوي دي. په ورته وخت کې د یاد غورځنګ یو بل غړي عالمزېب مسید بیا ویلي چې پاکستان تل د ډیورنډ فرضي کرښې دا غاړه پښتانه د افغان جګړې لپاره کارولي دي خو خبرداری یې ورکړی دی چې پښتانه نور هوښیار شوي دي او له دې وروسته به هیڅکله د پردۍ جګړې قرباني نه شي. هغه پر نړیوالې ټولنې هم غږ کړی دی چې د دوی غږ واوري او هر څه ژر دې په پښتون افغان وطن کې د روانو ناخوالو پر ضد خپل غږ پورته کړي.
