ترکیه وایي د افغان کډوالو د ورتګ د مخنیوي لپاره یې له ایران سره په سرحدي سیمه کې امنیتي تدابیر سخت کړي دي. د ترکیې د وان ولایت والي په یوه خبري غونډه کې ویلي چې له ایران سره یې لسګونه کیلومتره ګډه پوله باندې سیمټي دیوال جوړ کړی دی او تر څنګ یې نور امنیتي تدابیر هم نیولي څو له افغانستان د ورتلونکو کډوالو د ورتګ مخه ونیسي. سرچینې ویلي په تېره یوه میاشت کې یې په دغه سیمه کې شپږ سوه غیر قانوني کډوال نیولي دي چې بېرته یې د اړولو چاره پيل شوې ده. د ترکیې حکومت ویلي چې دوی له کډوالو سره هېڅ ډول همکاري نه کوي نو له همدې امله افغان کډوالو ته هلته د اوسېدو ځای نشته دی. ترکیې تر دې وړاندې هم زرګونه افغان کډوال تر نیولو وروسته بېرته افغانستان ته رالېږلي دي.
