د امریکا کانګریس له ایران سره د بایډن ادارې د اړیکو په اړه خبرداری ورکړی دی. د امریکا د کانګریس ځینې غړي وایي داسې احتمال شته چې د بایډن اداره به د اټومي خبرو د پرمختګ لپاره د ایران پر نوي ولسمشر ابراهیم رییسي بندیزونه لرې کړي. د کانګریس غړو په یوه لیک کې له بایډن غوښتي چې له ایران سره د مذاکراتو ټول جزیات باید له دوی سره شریک شي او په قتل عام له تورن رییسي دې بندیزونه نه لرې کېږي. د امریکا کانګریس وایي چې رییسي د زرګونه کسانو د اعدام حکمونه ورکړي دي او دغه راز د ایران د ظالم نظام په سر کې دی نو ځکه د کانګریس له مشورې پرته له نوموړي سره د بایډن د ادارې اړیکې د منلو نه دي. په ورته وخت کې د امریکا د بهرنیو چارو وزارت وایي، تمه لري چې د رییسي د حکومت پر مهال د ایران اټومي معامله حل فصل شي.
