وزیرستان کې؛ پنځو پاکستاني پوځیانو ته مرګ ژوبله اوښتې

د خیبرپښتونخوا په شمالي وزیرستان کې د پاکستاني پوځ پر یوه پوسته د وسله والو کسانو په برید کې پنځو پوځیانو ته مرګ ژوبله اوښتې ده. د پاکستاني رسنیو د راپورونو له مخې، دا پېښه د شمالي وزیرستان ګړیوم سیمه کې د پوځیانو پر پوسته د وسله والو کسانو د برید له امله رامنځته شوې ده چې په نتیجه کې یې درې پوځیان وژل شوي او دوه نور ټپيان شوي دي. د پاکستاني پوځ د خبرپاڼې له مخې په دې پېښه کې وژل شوي پوځیان د پنجاب سرګودې سیمې سره تړاو لري. تر اوسه پورې د برید پړه کومې وسله والې ډلې پر غاړه نه ده اخیستې خو د پاکستاني طالبانو مشر څو ورځې وړاندې پر پاکستاني پوځیانو او ادارو د پراخو بریدونو خبرداری ورکړی دی.