د روغتیا نړیوال سازمان وايي، په افغانستان کې د میلیونونو کسانو د درملنې لپاره شته طبي وسایل یواځې څو ورځې نور کار کوي. دا سازمان وایي، د کابل په هوايي ډګر کې له بمي چاودنې وروسته په اکثره روغتونونو کې طبي وسایلو ته سخته اړتیا ده. روغتیا سازمان وايي، په روغتونونو کې اړینو توکو، درملو او د خوار ځواکۍ ماشومانو لپاره د مغذي توکو کموالی لیدل کېږي. دې سازمان ویلي د حامد کرزي له هوايي ډګر څخه سوداګریزې الوتنې د امنیتي ستونزو له امله بندې شوي، له دې امله دوی په نورو لارو غور کوي چې دغه هېواد ته درمل او طبي وسایل واستوي. روغتیا سازمان وايي، دوی دې ته ژمن دي چې په افغانستان کې پاتې شي او له اړینو او بې ځایه شویو خلکو سره مرستې وکړي.
