چين: امریکا دې په خپلو بندیزونو د افغانانو ژوند نه سختوي

وروسته تر هغه چې د ا.ا.ا یو تن ویاند سهیل شاهین وویل چې امریکا باید د افغانستان مالي پانګه له توقیفي حالت څخه بهر کړي، د چین د بهرنیو چارو وزارت د نوموړي دا غوښتنه معقوله بللې او ټینګار یې کړی دی چې امريکا باید د افغانستان مشروع او معقولې غوښتنې په نظر کې ونيسي. د چین نړیوالې راډیو د جاو لي جیان له قوله ویلي چې دا شتمنۍ په افغانانو پورې اړه لري او امریکا نباید په خپلو بې ځایه بندیزونو د افغانانو ژوند سخت کړي. هغه ویلي چې امريکا باید د فشار او بندیزونو تګلاره بدله کړي او د افغانستان د اقتصاد، د خلکو د ژوند، سولې او بیارغونې پر وړاندې دې خنډونه نه جوړوي.