چین له افغانستان سره ۱۵ میلیونه ډالره مرسته اعلان کړه

چین له افغانستان سره د پنځلس میلیونه ډالرو او درې میلیونه کرونا ضد واکسینو مرسته اعلان کړه. په کابل کې د چین سفیر د کډوالو چارو وزارت له سرپرست سره د لیدنې پر مهال ویلي چې دوی د افغانستان له نوي حکومت سره هر ډول مرستو ته تیار دي او هڅه کوي په اړینو برخو کې د افغانستان لاسنیوی وکړي. دده په خبره د چین مرستې بې قید او شرطه دي او په اړینو مواردو کې به ترسره کېږي. د چین سفیر وانګ یو وایي چې د همدې همکاریو په ادامه یې تازه له افغانستان سره د پنځلس میلیونه ډالرو او همدا راز درې میلیونه دوزه کرونا ضد واکسین مرسته اعلان کړې ده. دده په خبره دغه مرستې په لومړي سر کې د پنځه میلیونه ډالرو په ارزښت کمپلې او د ژمي نور توکي شامل دي او د لسو میلیونو دالرو په ارزښت به خوراکي توکي افغانستان ته ورکړي چې د ژمي تر را رسېدو مخکې پر اړمنو کسانو ووېشل شي. چین تر دې وړاندې هم له افغانستان سره د میلیونونه ډالرو نقدي مرستو او کرونا ضد واکسین د ورکړې ژمنې کړې دي.