د چين د هوايي او فضايي چارو ۱۳م نړيوال نندارتون د سپتمبر په۲۸مې نېټې د ګوانګ دونګ ولايت په جو های ښار کې پرانېستل شو او ټاکل شوې، چې د اکتوبر تر ۳مې نېټې پورې به دوام ولري.
د ۲۰۲۱م کال د جوهای فورم مسؤلينو د روانې مياشتې په ۲۷مه نېټه څرګنده کړه، چې د چين فضايي چارې اوس د چټک پرمختګ مرحلې ته ننوتلې دي. د مختلفو هېوادونو اړوند شخصيتونه تمه لري، چې له چين سره د هوايي او فضايي چارو په برخو کې لا زياتې همکارۍ او تګ راتګ وکړي، څو اړوندې خپلمنځي همکارۍ يې لا پراخې او ژورې شي.
د چين د فضايي ټکنالوژۍ ډلې عمومي مېنيجر شو چيانګ، چې د هېواد په څو مهمو فضايي پروژو کې یې برخه اخيستې، په همدې ورځ په دغه فورم کې وويل، چې د چين د فضايي ټکنالوژۍ ډلې د اقتصادي او ټولنيز پرمختګ ۱۳م پنځه کلن پلان په موده کې له برازيل، ايټاليا او فرانسې سره په ګډې همکارۍ د مصنوعي سپوږمکۍ د توغولو په اړه ۱۷ مهمې نړيوالې پروژې په برياليتوب تر سره کړي، د الجزاير او پاکستان په ګډون څو هېوادونو ته يې ۱۰ ملکي سپوږمکۍ جوړې کړي او له چانګ عه ۴ نمبر اکتشافي دستګاه څخه په ګټې اخيستنې يې له زياتو هېوادونو سره ګډې علمي څېړنې کړې دي.
هغه دا هم وويل، چې انسانان به په ټوله نړۍ کې د تخنيکي او صنعتي انقلاب د نوې څپې په راپورته کېدو سره د بهرنۍ فضا د اکتشاف او ورڅخه د ګټې اخيستنې لا سترې موخې ولري او د اړوندو همکاريو اړتياوې به هم زياتې شي.
په چين کې د روسيې د فضايي چارو دولتي ډلې عمومي استازي سخورکوف ياد فورم ته په خپله وينا کې د روسيې فدراسيون د فضايي چارو پرمختيايي حالت او راتلونکی پلان معرفي کړ او د بهرنۍ فضا د اکتشاف په برخه کې يې له لا زياتو هېوادونو سره د خپلې همکارۍ نيت او هيله وښوده. هغه د دې يادونه هم وکړه، چې روسيې او چين د روان کال په مارچ کې پر سپوږمۍ د علمي څېړنې نړيوال سټېشن د جوړولو په اړه د تفاهم يادښت لاسليک کړی دی. نوموړي خبر ورکړ، چې اوس روسيه او چين پر سپوږمۍ د علمي څېړنې نړيوال سټېشن د ګډې پروژې تر چوکاټ لاندې نژدې همکارۍ کوي او اړوند تړون يې د چمتو کېدو په حال کې دی. هغه زياته کړه، چې د روسيې او چين ترمنځ فضايي همکاری ښه اينده او ستر اهميت لري، ځکه دواړه هېوادونه د بهرنۍ فضا د اکتشاف او د سوله ييزې استفادې په برخو کې ګډې ګټې لري.
برسېره پر دې، چين او فرانسه هم له اوږدې مودې راهيسې، زياتې فضايي همکارۍ ترسره کوي. د فرانسې تېليس ډله، چې په اروپا کې د بهرنۍ فضا د اکتشاف په برخه کې زياتې چارې ترسره کوي، څه باندې څلور لسيزې دمخه چيني بازار ته ننوتلې ده. د دغې ډلې د چيني چارو اجرائيه مشر جېروم بېنديل د چين د فضايي او هوايي چارو پرمختګ په اړه ژوره خاطره لري. هغه وويل، چې چين پر سپوږمۍ د اکتشاف، پر مريخ د اکتشافي دستګاه د ښکته کېدو او انسان وړونکې فضايي بيړۍ په شمول څو چارو کې ډېر وتلي برياليتوبونه او لاسته راوړنې لري. د دې تر څنګ د دغه هېواد ملکي هوايي چارو ادارو او هوايي شرکتونو هم چټک پرمختګ موندلی دی.
نن ورځ په ټوله نړۍ کې د فضايي چارو زیات پرمختګونه موندل شوي دي. د امريکايانو لخوا جوړ شوی د فلکن نهه (Falcon 9) په نوم راکټ د بيا کارول کېدو چارې بريالۍ شوي، په روسيه کې د فضايي اکتشافي دستګاه د توغولو نوی ډګر فعال شوی، په جاپان کې د د هيابوسه دوه (Hayabusa2) په نوم اکتشافي دستګاه د نوي ستوري نمونوي خاورې ځمکې ته راښکته کړې او د عربي متحده اماراتو د ال ـ امال (Al-Amal) په نوم اکتشافي دستګاه پر مريخ وګرځېده.
د چين د فضايي چارو دولتي ادارې مرستيال ښاغلي وو يان هوا په خپلو خبرو کې دې ته اشاره وکړه، چې د انسانانو لخوا د بهرنۍ فضا اکتشافي ګامونه ورځ تر بلې چټک کېږي. چين به د مساواتو، متقابلو ګټو، سوله ييزې استفادې او ټولشموله پرمختګ پر اصولو، له ډېرو هېوادونو سره په دې برخه کې لا زیاتې همکارۍ او نظر تبادلې وکړي.