روغتیا وزارت: له روغتیایي سکتور سره مرسته د نړیوالو مسوولیت دی

د عامې روغتیا وزارت وایي، که نړیواله ټولنه په روغتیايي برخه کې په خپل وخت مرستې ونه‌کړي، نو په افغانستان کې به لوی بشري ناورین را منځ ته شي. د عامې روغتیا وزارت د روغتیایي خدمتونو د وړاندې کولو معین عبدالباري عمري وایي، د هېواد د روغتیايي سکټور ۸۸ سلنه پر بهرنیو مرستو ولاړ و، خو د دې مرستو له بندېدو سره په ټول هېواد کې ۲،۳۰۰ روغتیايي مرکزونه تړل شوي دي. عمري وایي، چې نړیوال په دې برخه کې مسؤلیت لري. نومړی دا څرګندونې داسې مهال کوي چې د ماشومانو لپاره د ملګرو ملتونو وجهي صندوق یونېسف د افغانستان د روغتیايي سکټور د ناسم حالت خبره کړې وه. یونېسف ویلي وو چې د خوارځواکۍ له امله نږدې یو ملیون ماشومان د مړینې له ګواښ سره مخ دي.