د افغانستان ا.ا ویاند ذبیح الله مجاهد ویلي چې د څارنوالۍ او محکمې د ټولو برخو تر فعالیدو وروسته هغه کسان کولی شي د خپلو ځمکو د بېرته تر لاسه کولو لپاره عریضه وکړي چې ځمکې یې غصب شوې دي. هغه زیاته کړې چې د هغوی قضیې به څېړل کېږي او حق به حقدار ته سپارل کېږي. مجاهد وايي چې دمګړۍ پر دې کار روان دی څو د تازه غصب مخنیوی وشي. نوموړي څرګنده کړې، هر وزارت ته دنده سپارل شوې ده چې خپل غصب شوي ملکیتونه تثبیت کړي او دوسیې ورته جوړې کړي څو بېرته راوګرځول شي. د یادونې ده چې په تېر نظام کې ډېری زورواکانو د خلکو ځمکې لاندې کړې دي او کورونه یې پکې جوړ کړي دي خو مجاهد ډاډ ورکړی دی چې غصب شوې ځمکې به بېرته خپلو اصلي ملکانو ته ورکړل شي.
