په پنځو نورو ولایتونو کې د پاسپورت د وېش لړۍ پیلېږي. د افغانستان د پاسپورت ریاست مسوولینو په تازه څرګندونو کې ویلي چې نن به د هېواد په پنځو نورو ولایتونو کې هم د پاسپورت د وېش لړۍ پيل شي. سرچینه وایي چې سر له نن د هرات، بلخ، ننګرهار، خوست او پکتیا ولایتونو اوسېدونکي کولی شي په خپلو ولایتونو کې پاسپورتونه واخلي.
تر دې وړاندې یوازې په کابل کې د پاسپورتونو د وېش لړۍ روانه وه، چې خلکو ته یې پراخې ستونزې جوړې کړې دي او د ګڼې ګوڼې له امله څوک نه شي کولی په دغه ریاست کې خپلې چارې بشپړې کړې.
د پاسپورټ ریاست چارواکي بیا وایي دوی پوره هڅه کوي چې هر څه تنظیم کړي او د شته بې نظمیو مخنیوی وکړي.
