ا.ا: د رسنيو اړوند خپور شوی مکتوب يوازې توصیه ده

د افغانستان ا.ا د ویاند مرستیال بلال کریمي د رسنیو اړوند خپور شوي هغه مکتوب ته په اشارې چې پکې له رسنیو څخه د خپرونو د سمونې غوښتنه شوې وه ویلي، د رسنیو اړوند خپور شوی مکتوب یوازې یوه توصیه وه او عملي کول یې جبري نه دي. نوموړي له یوې بهرنۍ رسنۍ سره په تازه مرکه کې دغه راز رسنۍ د یو نظام لپاره مهمې او ارزښتناکې بللې دي او ټینګار یې کړی دی چې دوی یې ملاتړ ته ژمن دي. هغه د خپلو خبرو پر دوام څرګنده کړې ده چې رسنۍ د ممبر ارزښت لري نو لازمه ده چې خپل رسالت په ښه توګه ادا کړي. د یادونې ده چې په دې وروستیو کې ا.ا د یو مکتوب په خپرولو سره له رسنیو څخه غوښتنه کړې وه چې باید د داسې خپرونو، ډرامو او فلمونو له خپرولو ډډه وکړي چې د اسلامي او ملي ارزښتونو خلاف وي.