د امریکا ولسمشر ډونالډ ټرمپ په خپلو تازه څرګندونو کې ویلي، د کرونا له کبله د مړو شویو امریکایانو یاد یې له سترګو خوب تښتولی دی. نوموړي له اې بي سي خبري شبکې سره په خبرو کې ویلي، د کرونا د قربانیانو له ټولو کورنیو سره مینه لري او خپله ټوله هڅه به وکړي، چې له ۶۰ کلنۍ پورته کسان له مرګ وژغورل شي. ده ویلي، ډېرو کسانو خپلې دندې له لاسه ورکړې، ځینو د قرنطین پر مهال ځان وژنه وکړه او یا یې هم د نشه یي توکو کارولو ته مخه کړه، خو موږ باید په ګډه د امریکا د بیا ژوندي کولو لپاره لاس په کار شو. تازه وړاندوېنه شوې ده چې کېدای شي په امریکا کې د کرونا له کبله د تلفاتو شمېر ۱۳۵ زره ته ورسېږي. ټرمپ ویلي، د واکسینو پر جوړولو کار پیل شوی دی، خو وړاندوېنه نه شي کولی چې ګټور واکسین به جوړ کړای شي او که نه.
