په افغانستان کې د کاناډا پخواني سفیر کریس اکساندر وايي، د امریکا له لوري کنګل شوې پانګه په افغانانو پورې اړه لري او پاکستان باید د سپټمبر یوولسمې بریدونو قربانیانو ته تاوان ورکړي. نوموړي پر خپله ټویټر پاڼه لیکلي، چې د افغانستان د مرکزي بانک شتمني په افغانانو پورې اړه لري. هغه لیکلي پاکستان باید د سپټمبر د یوولسمې نېټې د بریدونو قربانیانو ته تاوان ورکړي، هغه بریدونه چې په کراچۍ کې د یوه مشر په مشرۍ پلان شوي وو چې تر ۲۰۱۱ کال پورې د پاکستان له خوا خوندي شوی و. د راپورونو له مخې امریکا په افغانستان کې د زمري میاشتې له سیاسي بدلونه وروسته د افغانستان شاوخوا لس میلیارده ډالره پانګه کنګل کړه. د امریکا ولسمشر جو بایډن تیره اوونۍ د یادې شتمنۍ د ویشلو اجرایوي فرمان صادر کړ چې په هېواد دننه او بهر یې ګڼ غبرګونونه له ځانه سره لرل.
