ازبکستان وایي د بین الافغاني خبرو د پيل لپاره له ټولو هڅو او اقداماتو ملاتړ او ورسره همکاري کوي. د ازبکستان د بهرنیو چارو وزارت په افغانستان کې د ډاکټر عبدالله او ولسمشر غني ترمنځ له وروستي جوجاړي د هرکلي ترڅنګ ویلي هیله لري چې دا هر څه افغانان سولې او ثبات ته نږدې کړي. د سرچینې په خبره دوی ددې غوښتونکي دي چې ژر تر ژره په افغانستان کې بین الافغاني خبرې پيل شي او دلته روانه جګړه پای ته ورسېږي. د ازبکستان د بهرنیو چارو وزارت وایي دوی د بین الافغاني مذاکراتو په برخه کې د هر اقدام هرکلی کوي او بشپړې همکارۍ ته تیار دي. دغه هېواد همدا راز ټینګار کړی چې له افغانستان سره به یې اړیکې لا پیاوړې کړي او همکارۍ به لا پراخې شي.
