د م.م ځانګړی راپور ورکوونکی: د افغانانو د بشري حقونو خونديتابه ته دې پام وشي

په افغانستان کې د ملګرو ملتونو د بشري حقونو د وضعیت ځانګړي راپور ورکوونکي ریچارډ بنیټ ويلي چې د افغانانو د بشري حقونو خونديتابه ته دې پام وشي. هغه په کابل، بلخ او کندوز کې وروستيو بريدونو ته په اشارې ويلي چې په دې اړه به خپلو څېړنو ته دوام ورکړي. هغه پر خپل ټويټر ليکلي چې د تېرې اونۍ د غمجنو پېښو د قربانيانو له کورنيو سره ولاړ دی او په دې اړه خپلو څېړنو ته ادامه ورکوي. بنيټ زياته کړې چې د افغانانو بشري حقونه بايد خوندي شي او په نړيواله کچه تضمين شوی عدالت بايد تامين شي. تر دې وړاندې د بشري حقونو د څار سازمان هم ويلي وو چې افغانستان کې ملکي وګړي د ترهګرۍ له جدي ګواښ سره مخ دي او په وينا يې چې دا ګواښ بايد بابيزه ونه ګڼل شي.