د مخکني حکومت ځینې نظامیان چې د نظام له سقوط وروسته یې هېواد پرېښی، وايي، غواړي بېرته هېواد ته ستانه شي او د خپل هېواد په ودانولو کې برخه واخلي. هغوی د یو بل منلو او سولې غوښتنه کوي څو بېرته هېواد ته راستانه شي او په ودانولو کې یې برخه واخلي. دغه نظامیان وايي، د مخکني نظام له سقوط وروسته یې له ناچارۍ هېواد پرېښود او یوه ګاونډي هېواد ته یې پناه یوړوه. دوی وايي نورو هېوادونو ته کډوالي د مادي او مالي ستونزو تر څنګ انسان له فرهنګي ستونزو سره هم مخ کوي چې عمده ستونزه یې دا ده چې له پردي فرهنګ سره ټکر لري. دا په داسې حال کې ده چې د حکومت چارواکو عمومي عفوه اعلان کړې او له ټولو افغانانو غواړي چې خپل هېواد ته راستانه شي او له خطر پرته دې د ا.ا تر چتر لاندې ژوند وکړي.
