د امریکا دفاع وزارت د میلیاردونو ډالرو په ارزښت هغه قراردادونه لغوه کوي چې د افغانستان د پخوانيو امنیتي ځواکونو د تمویل لپاره شوي وو. د افغانستان پر بيارغونې د امریکا د ځانګړي پلټونکي ادارې يا سیګار په هغه راپور کې چې پرون یې خپور کړی ویلي چې ښایي د دغو قراردادونو لغوه کول او حقوقي دعواوې کلونه وخت ونیسي. په راپور کې ویل شوي، دغه قراردادونه د افغانستان د امنیتي ځواکونو د تمویل صندوق له خوا شوي چې پر اساس یې له ۲۰۰۵ کال وروسته شاوخوا ۸۱ میلیارد ډالره د دغو ځواکونو د تجهیز، تمویل او تاسیساتو د ساتنې پر چارو لګول شوي دي. د امریکا د مرکزي قواوو د قومندانۍ ویاندې په تېره مارچ میاشت کې ویلي وو چې پوځ شاوخوا ۹۰۰ قراردادونه په نښه کړي چې باید لغوه شي؛ خو دا نه ده څرګنده چې د امریکا حکومت به یې د لغوه کولو لپاره د قراردادونو مقابل اړخ ته نورې څومره پیسې ورکوي.
