جرمني ته د افغانانو پر تګ باندې محدویتونه لګول شوي

د جرمني د کورنیوچارو وزارت وايي، په پام کې لري چې دغه هېواد ته د افغان کډوالو ننوتل محدود کړي. د جرمني چاپ دیر شپیګل مجلې د چارواکو له قوله ويلي چې د دې پرېکړې پر اساس به په کال کې یوازې ۵ زره افغانانو ته جرمني ته د ننوتو اجازه ورکړل شي. د جرمني حکومت د اټکل له مخې د تېرکال په زمري میاشت کې د افغانستان د اسلامي جمهوريت تر پرځيدو وروسته د ۱۹ زرو په شاوخوا کې افغانان دغه هېواد ته ورغلي دي. جرمني ته د افغان کډوالو پر ورتګ د محدوديت لامل نه دی په ډاګه شوی خو په اوکراين کې د جګړې له پيل وروسته له دغه هيواده اروپا ته د کډوالو سيلاب ور مات شوی چې د نړيوالې ټولنې ډير پام ور ګرځيدلی دی.