ولسمشر غني وایي له زندانه د طالب بندیانو د خلاصون پروسه به چټکه او په دې برخه کې به جدي اقدامات ترسره شي. نوموړي نن د اختر تر لمانځه وروسته خپله وینا کې پر طالبانو غږ کړی دی هغه افغان امنیتي ځواکونه چې د دوی په بند کې دي هم باید ژر تر ژره خلاص کړي. ولسمشر غني زیاته کړې، باید پر دې حقیقت سترګې پټې نه شي چې طالبان د افغان ټولنې یوه ستره برخه جوړوي او هغه ځای چې دا حقیقت ثابتوي د خبرو مېز دی نه د جګړې ډګر. نوموړي د خپلو خبرو پر دوام وویل، سوله د افغان ملت او حکومت لومړیتوب دی او د سولې ګټونکي افغانان دي نه ډلې او اشخاص. هغه له طالبانو وغوښتل چې د جګړې په دوام سره افغانان زیانمن نه کړي او په خبره یې؛ غوره ده چې د جګړې او تاوتریخوالي پر ځای د خبرو له لارې ټول مسایل حل او فصل شي.
